YouVersion Logo
Search Icon

Piligu 1

1
Naawuni ni daa nam binshɛɣukam shɛm
1Piligu ni, Naawuni daa namla zuɣusaa mini dunia. 2Dunia ŋɔ daa ka taɣinamsi, di daa kul bela vau, ka zibisim limsi bɔɣ’ zilinli, ka Naawuni shia daa be kom zuɣusaa ginda. 3#2 Kɔr 4.6 Ka Naawuni daa yɛli, “Neesim, neema!” Ka neesim dii neei. 4Ka Naawuni daa nya ka neesim maa viɛla, ka o woligi neesim maa ka chɛ zibisim. 5Ka Naawuni daa boli neesim maa wuntaŋ’ ni, ka boli zibisim maa mi yuŋ. Ka di daa niŋ zaawuni, di nyaaŋa ka biɛɣu neei; ka di niŋ dabisili din daŋ tooni.
6 # 2 Pita 3.5 Ka Naawuni daa yɛli, “Foliŋga, niŋmi kom ŋɔ sunsuuni m-pirigi kom maa buyi.” 7Ka Naawuni daa chɛ ka foliŋga maa pirigi kom din be di tiŋli mini di zuɣusaa maa buyi. Ka di daa shiri niŋ lala. 8Ka Naawuni daa boli foliŋga maa “Zuɣusaa.” Ka di daa niŋ zaawuni, di nyaaŋa ka biɛɣu neei; ka di niŋ dabisili din pah’ ayi.
9Ka Naawuni daa lan yɛli, “Kom din be foliŋga tiŋli ŋɔ laɣimmi dɔni luɣ’ yini, ka chɛ ka tiŋgban’ kuŋ yi n-dɔni.” Ka di daa shiri niŋ lala. 10Ka Naawuni daa boli tiŋgban’ kuŋ maa “Tiŋgbani,” ka boli kom din laɣim do luɣ’ yini maa mi “Teeku.” Ka Naawuni daa nya li ka di viɛla. 11Ka Naawuni daa lan yɛli, “Binyɛra din bindi tiŋgban’ ni ka mali biɛlim mini tihi din wala mali kpila balibu kam zaa, bilimiya.” Ka di daa shiri niŋ lala. 12Ka binyɛra din bindi tiŋgban’ ni ka mali biɛlim mini tihi din wala mali kpila balibu kam zaa shiri bili. Ka Naawuni daa nya li ka di viɛla. 13Ka di daa niŋ zaawuni, di nyaaŋa ka biɛɣu neei; ka di niŋ dabisili din pah’ ata.
14Ka Naawuni daa lan yɛli, “Neesim shɛŋa neemiya zuɣusaa sagbana ni n-woligi wuntaŋ’ ni ka chɛ yuŋ,” ka neesim maa wuhiri shihira ni saha ni dabisa ni yuma; 15ka lan nyɛ zuɣusaa neesim din ne dunia ni. Ka di daa shiri niŋ lala. 16Ka Naawuni daa lan nam neesim kara ayi n-chɛ ka din galisi pam la ne wuntaŋ’ ni, ka chɛ ka din pa di zuɣu mi ne yuŋ; ka daa nam saŋmarisi gba. 17Ka Naawuni daa zaŋ ba niŋ foliŋga maa zuɣusaa ni bɛ ne dunia ŋɔ ni, 18ka su wuntaŋ’ ni mini yuŋ, ka woligi neesim ka chɛ zibisim. Ka Naawuni daa nya li ka di viɛla. 19Ka di daa niŋ zaawuni, di nyaaŋa ka biɛɣu neei; ka di niŋ dabisili din pah’ anahi.
20Ka Naawuni daa lan yɛli, “Chɛ ka binnɛma pam be kom ni, ka chɛ ka noonsi be zuɣusaa sagbana tiŋli yiɣiri gindi dunia ni.” 21Ka Naawuni daa lan nam binnɛma zaɣ’ kara niŋ teeku ni, ka nam binnɛma balibu kam bɛn be kom ni chana ni noonsi balibu kam. Ka Naawuni daa nya ba ka bɛ viɛla. 22Ka o daa niŋ alibarika niŋ bɛ ni ka yɛli ba, “Dɔɣimiya ka wɔɣi n-nab’ pali teeku mini dunia.” 23Ka di daa niŋ zaawuni, di nyaaŋa ka biɛɣu neei; ka di niŋ dabisili din pah’ anu.
24Ka Naawuni daa lan yɛli, “Binnɛma balibu kam, bɛnya tiŋgbani zuɣu; niɣi mini binnɛma bɛn gbamdi tiŋa ni mɔɣu ni biŋkɔbiri balibu kam.” Ka di shiri niŋ lala. 25Ka Naawuni daa nam mɔɣu ni biŋkɔbiri balibu kam zaa, ka nam niɣi balibu kam zaa, ka nam binnɛma bɛn gbamdi tiŋa balibu kam zaa. Ka Naawuni daa nya ba ka bɛ viɛla.
26 # 1 Kɔr 11.7 Di saha ka Naawuni daa lan yɛli, “Chɛliya ka ti nam ninsala ŋ-ŋmahindi timaŋa, ka o be kaman ti ni be shɛm ŋɔ, ka chɛ ka bɛ su zahim mini noonsi ni niɣi ni dunia ŋɔ zaa ni binnɛma balibu kam bɛn gbamdi dunia ŋɔ ni fukumsi.” 27#Mat 19.4; Maak 10.6 #Pil 5.1-2 Naawuni daa nam ninsala ŋ-ŋmahindila omaŋa, ka o be kaman Naawuni ni be shɛm. O daa nam ba la doo mini paɣa. 28Ka Naawuni daa niŋ alibarika niŋ bɛ ni ka yɛli ba, “Dɔɣimiya n-nab’ pali dunia ŋɔ n-su di fukumsi; ka su teeku puuni zahim mini noonsi ni binnɛma balibu kam bɛn be dunia ŋɔ ni.” 29Ka Naawuni daa lan yɛli ba, “Nyama, n zaŋ binyɛra din bindi tiŋgban’ ni zaa ka mali biɛlim mini tia kam din wala mali kpila n-tin ya ni yi dira; 30ka zaŋ bimbilli kam din maha n-ti mɔɣu ni biŋkɔbiri balibu kam mini binnɛma balibu kam bɛn mali nyɛvili zaŋ tabili noonsi balibu kam ni binnɛma balibu kam bɛn gbamdi tiŋgban’ ni ni bɛ dira.” Ka di daa shiri niŋ lala. 31Ka Naawuni daa nya o ni nam binshɛɣukam maa zaa, ka di viɛl’ pam. Ka di daa niŋ zaawuni, di nyaaŋa ka biɛɣu neei; ka di niŋ dabisili din pah’ ayɔbu.

Currently Selected:

Piligu 1: DBwDB

Highlight

Share

Copy

None

Want to have your highlights saved across all your devices? Sign up or sign in

YouVersion uses cookies to personalize your experience. By using our website, you accept our use of cookies as described in our Privacy Policy