YouVersion Logo
Search Icon

GÉNESIS 1

1
Diospa tukuy imaymanata kamasqan
1Qallariypin Diosqa hanaq pachata kay pachatawan kamarqan.#1.1 T'ikrakullanmantaqmi: “Hanaq pachata kay pachatawan kamayta Dios qallarishaqtin, …” nispapas. 2Kay pachaqa rawisqa ch'usaqmi kasharqan, laqhayaqtaq chinkay-chinkay ukhu unuta pakasharqan. Diospa Espiritunmi unu patapi muyusharqan.
3Diosmi nirqan: –K'anchay kachun, nispa. Chaymi k'anchay karqan. 4Diosmi rikurqan k'anchayqa allin kasqanta, k'anchaytataq laqhayaqmanta t'aqarqan. 5Hinaspan Diosqa k'anchayta “P'unchay” nisqata suticharqan, laqhayaqtataq “Tuta” nisqata suticharqan. Hinan ch'isiyaykurqanpas illarimurqanpas. Kaymi ñawpaqkaq p'unchay karqan.
6Diosmi nirqan:
–Unu chawpipi t'aqaq ch'usaq kachun, hinaspa unumanta unuta t'aqachun, nispa. 7Diosmi ruwarqan t'aqaqpaq ch'usaqta, hinan ch'usaq urapi kaq unu t'aqakurqan ch'usaq patapi kaq unumanta. Ahinataq karqan. 8Diosqa t'aqaq ch'usaqtan suticharqan “Hanaq Pacha” nisqata. Hinan ch'isiyaykurqanpas illarimurqanpas. Kaymi iskaykaq p'unchay karqan.
9Diosmi nirqan:
–Hanaq pacha urapi kaq unu hukllaman huñukuchun, hinaspa ch'aki rikhurichun, nispa. Ahinataq karqan. 10Hinaspan Diosqa ch'aki kaqta suticharqan “Hallp'a” nisqata, huñusqa unutataq suticharqan “Lamar-qocha” nisqata. Diosmi rikurqan allin kasqanta.
11Hinaspan Diosqa nirqan:
–Hallp'a phutuchichun llapa q'omerta, muhuyoq qorakunata, rurunpi muhuyoq sach'akunata, nispa. Ahinataq karqan. 12Hinaqtinmi hallp'aqa phutuchimurqan llapa q'omerta, muhuyoq qorakunata, rurunpi muhuyoq sach'akunata. Diosmi rikurqan allin kasqanta. 13Hinan ch'isiyaykurqanpas illarimurqanpas. Kaymi kinsakaq p'unchay karqan.
14Diosmi nirqan:
–Hanaq pachapi k'anchaqkuna kachun p'unchaytawan tutatawan t'aqananpaq, hinallataq mita-mitata, p'unchay-p'unchayta, wata-watatapas señalaqpaq. 15Kallachuntaq hanaq pacha ch'usaqpi kay pachata k'anchamunanpaq, nispa. Ahinataq karqan. 16Diosmi iskay hatun k'anchaqkunata ruwarqan, hatunkaq k'anchaqta p'unchay k'anchananpaq, huch'uykaq k'anchaqtataq tuta k'anchananpaq. Ruwallarqantaq ch'askakunatapas. 17Hinaspan Diosqa hanaq pachapi k'anchaqkunata churarqan, kay pachata k'anchamunankupaq, 18p'unchaypas tutapas k'anchanankupaq, k'anchaytawan laqhayaqtawan t'aqanankupaqwan. Diosmi rikurqan allin kasqanta. 19Hinan ch'isiyaykurqanpas illarimurqanpas. Kaymi tawakaq p'unchay karqan.
20Diosmi nirqan:
–Unu wakwachimuchun kawsashaq animalkunata, hallp'a altopitaq phalaq animalkuna phalachun, nispa. 21Hinaspan Diosqa kamarqan hatuchachaq qocha animalkunata, unupi llapa kawsaqkunata, llapa phalaq animalkunatapas. Diosmi rikurqan allin kasqanta. 22Hinaspanmi Diosqa chaykunata samincharqan:
–Askhata miraychis, lamar-qochaman hunt'aykuychis, phalaq animalkunapas kay pachapi askhayaychis, nispa. 23Hinan ch'isiyaykurqanpas illarimurqanpas. Kaymi phisqakaq p'unchay karqan.
24Diosmi nirqan:
–Hallp'a rikhurichichun tukuy rikch'aq kawsashaq animalkunata: uywakunatapas, suchuq animalkunatapas, salqa uywakunatapas, nispa. Ahinataq karqan. 25Hinaspan Diosqa ruwarqan tukuy rikch'aq uywakunata, suchuq animalkunata, salqa uywakunatapas. Diosmi rikurqan allin kasqanta.
26Hinaspanmi Diosqa nirqan:
–Runata ruwasunchis ñoqanchisman rikch'akuqta, rikch'ayninchisman hina. Kamachichuntaq challwakunata, phalaq animalkunata, uywakunata, suchuq animalkunatapas, kay pachantinpi, nispa.
27Hinaspan Diosqa runata kamarqan,
Diosman rikch'akuqtan paytaqa kamarqan,
qharita warmitawanmi kamarqan.
28Diosqa paykunata saminchaspan nirqan:
–Askhata miraychis,
kay pachamanpas hunt'aykuychis,
chaypi munayniyoq kaychis,
kamachiychistaq challwakunata, phalaq animalkunata,
kay pachapi puriq, suchuq llapa animalkunatapas, nispa.
29Diosmi nirqan:
–Kayqa mikhunaykichispaqmi qoykichis kay pachantinpi llapa muhuq qorata, llapa rurunpi muhuyoq sach'akunatapas. 30Qollanitaqmi lliw kay pacha uywakunamanpas, lliw phalaq animalkunamanpas, lliw suchuq animalkunamanpas, tukuy kawsaqkunamanpas llapa q'omer qorata mikhunankupaq, nispa. Ahinataq karqan. 31Diosmi rikurqan llapa ruwasqankunata ancha allin kasqanta. Hinan ch'isiyaykurqanpas illarimurqanpas. Kaymi soqtakaq p'unchay karqan.

Currently Selected:

GÉNESIS 1: QUECUZ

Highlight

Share

Copy

None

Want to have your highlights saved across all your devices? Sign up or sign in

YouVersion uses cookies to personalize your experience. By using our website, you accept our use of cookies as described in our Privacy Policy