1

Sensus si pemena i Israel

1I bas wari si pemena bulan si peduaken, i bas tahun si peduaken kenca bangsa Israel lawes i Mesir nari, ngerana TUHAN man Musa i bas Kemah Perjumpan i gurun pasir Sinai. Nina, 2“Kam ras Harun, la banci la isensusndu bangsa Israel rikutken suku-suku ras keluargana. Suratken kerina gelar dilaki, 3si umurna dua puluh tahun ku das si ngasup ertugas i bas tentera. 4Pindo sekalak kepala keluarga i bas tep-tep suku nari guna nampati kam.” 5-16Enda me gelar-gelar dilaki, peminpin-peminpin i bas sukuna, si ipilih i bas perpulungen e nari guna ndahiken dahin enda:

Suku:	Kepala keluarga:
Ruben	Elisur anak Sedeur
Simeon	Selumiel anak Surisaddai
Juda	Nahason anak Aminadap
Isakar	Netanel anak Suar
Sebulon	Eliap anak Helon
Eperaim	Elisama anak Ammihut
Manase	Gamaliel anak Pedasur
Benyamin	Abidan anak Gideoni
Dan	Ahieser anak Ammisaddai
Aser	Pagiel anak Ohran
Gat	Eliasap anak Rehuel
Naptali	Ahira anak Enan

17Alu penampat si sepuluh dua kalak enda me Musa ras Harun 18ndilo kerina perpulungen e pulung i bas wari si pemena bulan si peduaken jenari isuratkenna rikutken suku-suku ras keluargana. Gelar-gelar kerina dilaki si umurna dua puluh tahun ku das isuratken ras ikira, 19bagi si enggo ipedahken TUHAN. Musa nuratken bangsa Israel i gurun pasir Sinai. 20-46Dilaki si umurna dua puluh tahun ku das si ngasup jadi tentera isuratken rikutken suku-suku ras keluargana, ibenaken i bas suku Ruben, anak Jakup sintua. Jumlahna kerina e me rikutken si tersurat arah teruh enda:

Suku:	Teremna:
Ruben	46.500
Simeon	59.300
Gat	45.650
Juda	74.600
Isakar	54.400
Sebulon	57.400
Eperaim	40.500
Manase	32.200
Benyamin	35.400
Dan	62.700
Aser	41.500
Naptali	53.400
Jumlah:	603.550

47Kalak Lewi la isuratken raduken suku-suku si deban, 48sabap enggo ikataken TUHAN man Musa nina, 49“Adi isensusndu kalak si ngasup jadi tentera, ola ibahanndu ikut suku Lewi. 50Tapi tugaskenlah kalak Lewi ngurus Kemah Perjumpan ras kerina perkakas-perkakasna. Kalak e si ngangkat Kemah ras perkakasna, erdahin i je, ras kemahna ipajekkenna i sekelewetna. 51Adi ipindahkenndu inganndu erkemah, arus kalak Lewi mbongkarsa KemahKu jenari majekkenca ka i bas ingan erkemah si mbaru. Ise reh ndeher ku KemahKu e seakatan suku Lewi arus ibunuh. 52Bangsa Israel si deban arus majekken kemahna rikutken terpuk-terpukna, tep-tep kalak ras perpulungenna janah i teruh bendera terpukna. 53Tapi suku Lewi arus erkemah i sekelewet KemahKu e lako njagasa, gelah ola ise pe reh ndeher ku je. Adi ideheri kalak merawa Aku janah Kupalu bangsa Israel.” 54E maka ibahan bangsa Israel kerina si enggo ipedahken TUHAN man Musa.

BILANGEN 1:1 BTX

BILANGEN 1:1 BTX

Planos de Leitura e Devocionais Gratuitos relacionados com BILANGEN 1:1

Compartilhar

Escolha Seu Idioma